Adieu, persona que me legisses! Soi la Mariona e ai enveja de te parlar.
La setmana passada soi anada a l'Escòla Occitana d'Estiu e m'es venguda l'enveja de faire una newsletter per retornar al monde l'energia que m'a balhat una setmana d'escambis e de calor umana que m'a inspirat fòrtament.
Dempuèi que soi tornada de Vilanuèva d'Òlt, i a una frasa que me viroleja en cap…
De còps l'estiu es coma una mazurka.
Lo simbòl de l'estiu per ieu es la nuèit✨, tan longa coma la lutz pendent lo jorn. E la mazurka es la dança per excelléncia de las nuèits d'estiu. Sarrada, lenta, nostalgica mas coma una flama, tanben l'estiu coma la mazurka t'empòrta en dansa, te pren e te movimenta dedins e defòra.
La fin de l'estiu es pròcha, la fruta es madura dins los àrbols, la lutz del ser es mai iranja, mai intensa. Cossí s'es passat lo teu estiu? Lo mieu es estat plen d'onadas emocionalas, e plen tanben d'eveniments sus las lengas que m'an portat d'aprendissatges pregons, que ara vòli daissar repausar.
En mai ai enviat la mia primièra newsletter, en catalan, e en junh la primièra edicion en anglés. Dempuèi que soi independenta, tròbi un fòrt plaser a t'enviar mon vejaire sus mon moment present. Èstre independenta es un procès plan engatjant mas turbulent e dificil al mateis temps. Pensi que te ne parlarai -benlèu- dins lo futur. Tanben sus lo mieu trabalh de revitalizacion lingüistica… mas ara l'energia de l'estiu es encara leugièra.
E vaquí, lo moment just que cercavi per lançar la newsletter en occitan es arribat. Lo moment es ara. E ne soi contenta, per çò que crear una newsletter es tanben un procès, amb totes los blocatges creatius que se tròban: “segur qu'ai de fautas, mon occitan es pas corrècte, ai de catalanismes, me cal far la revisar los tèxtes”… e coma aquest pretèxte, ne tròbi sovent d'autres que m'empachavan d'enviar la newsletter ara, de daissar - doncas de respectar - las causas coma son (ancian perfeccionisme marrit).
Mentre èri a soscar sus aqueste procès creatiu, ai tirat una carta del jòc de cartas d'Osho e la responsa que m'a balhat es estada preciosa. La compartissi amb tu:
"L'autentica educacion t'ensenharà pas a èstre lo primièr. Te dirà que t'amuses amb çò que fas, pas per lo resultat mas per lo sòl fach de l'acte. Sonque aital pòt l'existéncia fluir a travèrs de tu. Alara pòt usar tas mans, tons dets e ton pincèl. Sonque alara pòt náisser quicòm de granda beutat.
Jamai es per tu, mas a travèrs de tu. L'existéncia fluís, tu ne siás sonque lo passatge. Tu la daissas succedir, la blòcas pas, aquò es tot.
Penses pas al resultat. Tot simplament, fai las causas ambe totalitat. Pèrd-te dins aquò. Desbremba qui o fa. Non «siasques», daissa las tuas energias fluir sens obstacles".
Demori que los vòstres jorns siasquen longs e plens de solelh. Se vòs arriba la sentor de vacanças que s'acaban… vos balhi qualques palliatius per la nostalgia aquí dessota.
